Beh Sha Pyrshah Ka Dak (Press On!) Philipi 3:12-14

Ø  Ha kane ka juk kaba ngi im mynta ka jingkhuslai ia kiei kiei ka jur bha ha ka jingim jong ngi ki briew. Ka jingshisha jong ka jingim ka long kumba don ka jingong ba ngi Kwah Kyrkieh, Khih Khuslai, bad Kut ha u lum jingtep.

Ø  Haba ngi peit ia ki jingjia ba ngi iohi man ka sngi ha ka pyrthei ki pynduh jingkyrmen ia ngi bad kine ki ktah ia ka jingim jong ngi ban khuslai. Ki khubor kiba ngi iohi bad iohsngew ki pynsngewtriem, sngewsyier, bad pynsheptieng ia ka jingim jong ngi. Ki jingjia ha ka pyrthei ki ktah ia ka jingngeit jong ngi ban pynartatien bad ban pynkhih ia ka jingmut jingpyrkhat jong ngi. Bun na ki briew kim kwah shuh ban iaid shakhmat ha ka jingim namar ki sngew ba ka jingim ka long kabym don jingmyntoi shuh bad ki kynran dien noh.

Ø  Bun na ngi wat haba ngi iohsngew ia ki jingkular kiba U Blei u la kular ha ngi ba ngim dei ban khuslai hynrei haduh mynta ki dang don kiei kiei hapoh jong ngi kiba pynlong ia ngi ban khuslai bad pynsheptieng. Ki jingkhuslai ki ktah ia ka lawei jong ngi, U John Haggai u ong, “Ka jingkhuslai ia ka lawei ka ktah, leh traikhlieh, bad pynjulor ia ka lawei.”

Ø  Hynrei ngim lah pat ban lait na kaei kaba ka ktien ka jong U Blei ka la iathuh ha ngi ba U Jisu U ong, Mathaios 6:27 “Uno te na phi, haba u da khuslai ruh, uba lah ban pyntam shi pruh ia ka rynieng?” To ngi pyrkhat ia kane ka ktien. Hato ngi lah mo ban pyntam ia ka kynta da kaba ngi khuslai? Em, hynrei ka jingkhuslai ka lah pynban ban pynlyngkot pynban ia ka jingim jong ngi. Da kaba pynbun ia ki jingkhuslai bad ki jingpyrkhat bymdei ka ktah ia ka koit ka khiah jong ngi. U Jisu u la ai ia ka jinghikai kaba long practical kaba iadei bad kane ka juk kaba ngi im.

Ø  Ka ktien U Blei ka ong shuh shuh ha ka dkhot ba 34 ka ong ba “Namar katta wat Khuslai na ka bynta kaba lashai, naba kata kaba lashai kan khuslai na ka bynta la ka jong.” Ngi don shibun ki jingkhuslai wat ia ka sngi kaba mynta balei ngin dang pynbun ka jingkhuslai ban pyrkhat na ka bynta ka lawei? Ki don katto katne ki jingshisha ba ka jingkhuslai ka ktah ia ka jingim jong ngi.

Ø  Ka long kaba shu pynlehnohei kai ia ka por, ka lam ia ka jingmut tang ha ki jingsniew ym ha kaban pynbha, ka shim ia ka jingkitkhlieh ha lade ym ka bynta U Blei, ka pyndkoh da ka jingsheptieng, ka tuh ia ka jingkmen, ka kjit ia ka bor, ka ialam bakla ba ngin nym lah ban leh ia ka mon U Blei. Namarkatta, lada ngi kwah ban jam ha ka lynti ka jingbha ha une u snem kaba donkam ba ngin leh ka long ban.

1. Bishar ia kiei kiei da ka Jingsngewrit (A Humble Evaluation).

Ø  Ong U Paul, “Ym ba nga la iohpdiang lypa, lane ba la pynjanai ia nga...” (dk 12a) kine ki kyntien ki pynkynmaw ia ngi ia ka jingsngewrit U Apostol Paul shakri jong U Blei, haba ngi tip shai ba U long U riewkhraw jong U Blei. U long uba la iashem markhmat bad U Trai Jisu ha ka lynti sha Damascus, U long u nongialap uba khraw ha kylleng ki thain ka Mediterranean, u long U Apostol ba la khot da U Blei, u long U nongthoh uba khraw uba la thoh ia ki shithi kiba bun ha ka ktien ka jong U Blei katkum ka jingpyrsad bor U Mynsiem Bakhuid, wat la U long U shakri jong U Blei uba ianeh skhem ha ka Jingngeit, bad wat la u la leh shibun kiei kiei ha ka jingim hynrei ym shym niew donbor ialade da kine kiei kiei kiba U leh.

Ø  U tip ba ma u ruh u long u nongpop uba la pynim da ka jingaiei ka jong U Blei. Ha kawei na ki bynta ka ktien ka jong U Blei ba u niew ialade kum uta ‘u nongpop uba khraw’ (1 Timothy 1:15). Wat la shibun kiei kiei kiba u la leh, u dang niew ialade ubym pat long janai lane uba lah poi sha ka jingiaid lynti kaba janai ha ka jinglong ba kynja mynsiem.

Ø  Kam shym don kano kano ka jingjanai ha kane ka jingim kaba ngi im. Ha ki por jong ka jingeh, jingjynjar bad jingsngewsih kthang ha ka jingim kam long kaba suk kaba ngin shu pdiang kumba ka long. Kam shym long kaba suk ban shu ong ‘Ai ba kan long kumba ka long’. Bun na ki briew kim shym phewshe ia ka jingim, ai daw, buhrieh, lehmynleh, kyntait ia ka jingshisha, im ka jingim kaba pynsngewbha ialade hynrei kine kim ai jinghun satia lane kim shym lah ban pynduh ia kata ka jingkhuslai ba ki don.

Ø  Hynrei ka jingshisha ka long ba ngim lah ban lait na ki jingeh jong ka jingim. Kaba donkam ia ngi ba ngin pyntngen ialade bad ban ong ‘Ai kan long kumba ka long’ bad ba ka jingaiei ka jong U Blei ngi lah ban iaid shaphrang ha ka jingim. Kumba U Paul u ong ba “ ym ba nga la iohpdiang lypa.” Ha kawei pat ka jingmut ka long “ba ngam pat shym la long u nongjop lypa.”

Ø  Ka jingma kaba ap ia ki Khristan ha kine ki sngi ka long ba ki lah kam lypa ba ki lah long kiba janai la ha ka jingim kaba kynja doh bad mynsiem. Ka long kaba suk ban long kum kita ki Khristan kiba sngewstad bad ban peit poh ia kiwei ha kaba ka ktien ka jong U Blei ka pynkymaw ia ka Jingduwai uto u Pharisee ban duwai “Ba nga ainguh ia Me Trai ba ngam long kum utei u Nongkhrong”. Ka long kaba suk ban leh pop namar ba pyrkhat ba ngi long kham khraw ban ia ka. U Martin Luther u Kdew ia ka jingsarong kaba ha ngi kaba ngi donkam ban “Kylla kaba mut ia ka jingaiti sha ka Jingkylla kaba mut.” Kaba thew ia ka jingkylla kaba mut kaba snoh lang bad ka jingsarong. (Nga lah kylla kaba mut khlem buhrieh shuh ia kiei kiei bad ngam long kum ma phi). Ka pop kaba snoh ha ngi ka iai don wat ha uta u symbai jong ka jingphla ka jong ngi ia ki pop kaba wanrah ia ka jingma ha kawei pat ka jinghap.

Ø  Lymda dei da ka jingaiei ka jong U Blei iwei na ngi ruh ngin nym lah ban ieng ha khmat jong U Trai. Namarkatta, ngim dei kiba stad kumba ngi mut, ngim dei kiba sian kumba ngi mut, ngim die kiba shai kumba ngi pyrkhat, ngim dei kiba bha kumba ngi sngew, ngim dei kiba khlain kumba ngi sngew. Kaei kaba pynlong ia ka jingim jong ngi kumne kumba ngi long dei namar ba ka jingaiei ka jong U ka dap biang ngi. U Trai Jisu Khrist U long tang ma U hi uba khlain, uba stad, uba bha, uba khuid, uba hok, uba dap da ka jingieit, uba kynrei ka jingisynei bad uba long ka lynti, ka jingim, bad ka jingshisha.

2. Ban buh ia ka thong da ka dohnud kaba shisha (A Hearty Determination).

Ø  Ong U Apostol Paul, “Hynrei nga beh shaphrang kein, ba kumta ngan ioh bat ia kata na ka bynta kaba la bat ia nga ruh da U Khrist Jisu.” (Dkt 12) To ngin pyrkhat shipor ha ki kyntien kiba khatduh kiba ong “La bat ia nga ruh da U Khrist Jisu.” Ka jingshisha jong ka jingim Khristan ngi lah ban shem ha kine ki kyntien ba, U Khrist u la shem ia nga, U Khrist U la pynim ia nga, U Khrist u la ai ia ka jingim kaba don jingmut. Namarkatta, ban shem ia ka jingim kaba don jingmut ka dei ia ngi ban wad ia ka jingmut kaba U don. Ban leh pat ia kata ka dawa ia ka jingim jong ngi ban pynlut ia ka por ha baroh shirta ka jingim jong ngi, ban treishitom bad jingpynleit jingmut, bad kane kan ialam sha ka jingroi ha ka jingaiei bad ban ka pynroi ia ka jinglong U Khrist ha ngi.

Ø  “Hynrei ia kane kawei nga leh, da kaba klet noh ia kita kiei kiei kiba shadien bad da kaba kner noh sha kiei kiei kiba shakhmat...” (Dkt 13) kane ka kyntien kaba ong “hynrei ia kane kawei nga leh” ka long ka kyntien kaba donkam bha ba ngi lah ban pyndonkam ha ka jingim. Lada baroh ngi pyndonkam ia kane ka kyntien kan long ka bor ia ka jingim jong ngi. Ym ban ngin ong ia kine ki 20 tylli ngan leh hynrei ong ia kane kawei nga leh, namar ka jingpynleit jingmut ia kano kano tang da kawei ka jingmut ka kham lah shibun ban ia kaba bun jingmut. Kaba pyrkhat tang ia kawei ka thong kan pynioh bun ka jingjop bad ka nong kaba khraw.

Ø  Ha ka jingim jong ngi don shibun ka plan hynrei ka long kabym pat shai satia kaei kaba ngi thmu ban leh. Kane ka lah ban long ba don kiei kiei kiba rim ki khang lad ia ka jingim jong ngi ban poi sha ka thong. Hynrei U Apostol Paul u pynkynmaw ia ngi ia ki ar tylli kiei kiei kiba ngi donkam ban leh, katta ka long ban klet noh ia kiei kiei kiba shadien.

Ø  Nuksa shaphang ka jingbat ia ka jingsngewsih

Ø  Kane ka long ka kyntien kaba bha lada ngi pyntreikam ha ka jingim jong ngi. Kaei kaba ngi donkam ban klet? Ka jingkhuslai, ka jingsheptieng, ka jingshahrem, ka jingshahjop, ka jingshah pynshitom ha ki nongshun. To ngin klet noh ruh ia ka jingjop jong ki por ba la leitnoh, ka jingioh ka jong ngi ia ka nam, ka kam ba bha ba ngi la leh, baroh ka nam bad ka burom ba ngi ioh. Kumba ki football coaches ki ju ong, ‘Ka snem ba la leit kam long eiei.’ La ngi la jop katno katno sien hynrei lada ngi rem kim long eiei shuh. Namarkatta, lada ngi dang peit ia kiei kiei kiba shadien ka jingim jong ngi ngin nym lah ban jam shakhmat.

Ø  Kaba ar kaba U Apostol Paul u ong “da kaba kner noh ia kiei kiei kiba shakhmat”. U David Livingston U missionary ba paw ka ri Africa haba u la wanphai na Africa sha England, u la shah interview, “Shaei pat phin leit haba phi la wan na kane ka jingleit Missionary ka jong phi sha Africa?” U la jubab “Nga long uba la kloi ban leit pat sa sha kano kano ka jaka ba la phah ia nga.” U ong “pyni ha nga kata ka jaka ba nga lah ban iaid shakhmat.” Kane ka long ka jinglong kaba ngi donkam ban don man ka sngi kum ki khun jong U Blei. “Trai nga long uba kloi ban leit shano shano ba Me phah ia nga, la ka long ha kano kano ka bynta ba ialam ia nga.” Bunsien ngi ju ai daw ia U Blei da kaba pynpaw ia ka jingbunkam ka jong ngi. Bunsien ngi ju ong to ngin sa leh da lah lait por. Hynrei, to ngin kynmaw ban pyrshang ban pynkohnguh sngur mynsiem ia U Blei la ka long ha kano kano ka bynta ba U Blei U buh ia ngi ban trei. To ngin trei shitrhem da kaba iabeh sha pyrshah kata ka dak kaba ma ngi baroh kum kiba ngeit kaba ngi dei ban poi.

3. Pyrkhat ia ka thong kaba kynja bneng (Heavenly Inclination).

Ø  “Nga beh sha pyrshah ka dak ban ioh ia ka jingiathong kaba ka jingkhot shaneng ka jong U Blei ha U Khrist Jisu.” Ha ka jingim ba kynja mynsiem, ngi donkam ia ka lynti ban ialam ia ngi sha ka jingim kaba don jingmut. Ki khristan kiba shisha kim lah ioh lypa ia ka bneng, hynrei ka jingthmu ka lynti jong ki ka ialam shata. Ha U Paul kaba klet ia kiei kiei kiba shadien bad ka jingiaid shaphrang ban ioh ia ka thong ka long kaba donkam.

Ø  Ha ka snem 1905 uwei u samla uba wan na ka longing kaba riewspah bha u la leit ban pule ha kawei ka University kaba pawnam kaba kyrteng ka Yale University. Ka ing ka sem jong U ka la kyrmen ba ynda u la dep ia ka degree jong u ba un ioh ban trei sha ri America. Hynrei U Blei u la ioh ban bat ia ka dohnud jong U ha kaba u la kloi ban long kum u nongiarap ban ialap ia ka gospel ha ri China. U la mih na America hynrei u khlem lah ban poi pat sha ri China namar ka jingshitom kaba la lap kynsan ia u. Hadien ka jingiap, la lap ia kawei ka jingthoh ha ka Bible jong une u samla kaba u thoh, “Ngan nym sngew kyrpang, Ngan nym kynran dien, Ngan nym bynnud.” Mano ba lah ban don kaba kum kane ka mynsiem?

Ø  U Paul u ong, ‘Ngam pat shym la poi, nga dang iai kiew’ lada u dang don ha kine ki sngi ba mynta ruh ka kyntien kaba un ong ia ngi ka long “Beh sha pyrshah ka dak.” Kam long kaba donkam tang ban lehbha ha kaba sdang hynrei ka donkam ruh ban pynkut da kaba bha. Kaba donkam ia ngi kum kiba ngeit ba ngim dei ban sheptieng ban ialeh ia ka thong ba ngi donkam ban pyndep. Ngim dei ban sheptieng kaei kaban jia ha une u snem uba thymmai. U Trai Jisu ruh U ong “Wat Sheptieng ngan long ryngkat lem bad phi.” kita kiba shaniah ha nga “Ngan nym pyrain buhkhoh ia ki.” Kumba u nongrwai shem mynsiem u ong,

Ha ka bor jong Me ngan shaniah,

Bor ka bym ju duh,

Dei ka bor jong me ban kyrshan,

Ba ngan iaineh ruh

Ø  Namarkatta to ngin iaid da ka jingngeit ha une u snem uba thymmai. Ngi lah ban iakynduh shibun kiei kiei lyngba jong une u snem hynrei ngin iai bat ia ka kular jong U kaba u ong “ Ngan nym iehnoh ia me da lei lei, lymne ngan nym leh lyndet noh ia me da lei lei” (Heb. 13:5) Wat sheptieng iaid shakhmat bad beh sha pyrshah ka dak .

AMEN